Serie: „Echt kölsch“ – „Et Rejalt üvver Strüüßjer un Kamelle!“

Januar 2015 / Echt Kölsch
«

Serie: „Echt kölsch“ – „Et Rejalt üvver Strüüßjer un Kamelle!“

Januar 2015 / Echt Kölsch 

Text von Elfie Steickmann aus dem Buch «Medden em Levve»

 

Rusemondaach! Et Sönnche laach vum Himmel, wie et sich för Kölle jehöt, de Pädsstaffel vun der Pulizei ka’mer allt aan der Eck sinn, un mer singe un schunkele uns op der Tribün am Zochwääch wärm. Nä, wat ess dat dis Johr widder en Freud! Et stemmp eifach alles wie em Bilderboch! Mer künne vun der Tribün des Foßjruppe bal met Handschlach bejröße. De ehschte Musikkapell: „Und dann die Hände zum Himmel“, ne Fastelovends-Hit! Ävver die dohinger kumme, Jung, die hann et hück nit mem Werfe. Die Kniesköpp bieße jo bal jede Kamell noch ens durch. Strüüßjer! Kamelle! Bützjer! He, Blaue Funk, drih dich doch och ens noh meer eröm! Met der Tafel Schukelad hätts do no verhaftich besser ziele künne. Jetz kütt einer, dä kennen ich jot! Dieter, Dieter, Diiieter...! Wiesu deit dä esu, wie wann hä nit wöss, wä ich wör? Hä lort mer tirecktemang en de Auge! Wadt, Kälche, wann ich dich bei der nöhkste Setzung treffe, dann häss do et hinger deer. Diiieter! Do, koot bevör hä met singem Wage öm de Eck ess, hät hä mich jesinn. Natörlich vill zo spät för e Strüüßje.

Wat ess, mer sin allt bei der Jrupp met der Nummer zwanzich, un bes jetz hann ich bloß drei schlappe Quotestrüüßjer un e paar Tafele Schukelad jeschnapp. Ess jo ne schwaache „Jewenn“! Alsu, wann ich morje mem Zoch om Ihrefeld jonn, schmießen ich met de Kamelle öm mich, dat et nor esu kraach! Dat kann et doch nit sin Do muss ich dem Jrielächers Roland bes aan der Wage vun der Bejaasch nohlaufe, un dann hät dä noch nit ens mih ei Strüüßje. Drei Mars-Riejele, dat wor et.

Do, ess dat nit der Wolfjang, minge Baas? Wolfjang, Wölfi, Wolfjang!!! Die ander Lück op däm Wage lore mich all aan un versöke durch Handzeiche minge Wolfgang zo aktiveere, doch dä steit luuter mem Rögge zo mer. Schad, met däm hätt ich doch esu jot aanjevve künne, dat ich dä kenne. Dat jläuv mer natörlich he op der Tribün kei Minsch. Ming Stemm ess allt ärch strapazeet: „Strüüßjer! Kamelle!

Do stonn die doch bal zehn Minutte vör unser Tribün un werfe nix! „Kniesköpp“ hören ich mich rofe. Woll ich eijentlich nit laut sage, ich dunn mich och jet schamme. Ävver leever Jott, op en Hand voll Kamelle weed et denne doch nit aankumme. Kribbelwasser suffe, dat künne die, ävver werfe!

Do vööre huh om Wage steit der Achim. Dä weed mich janz bestemmp nit erkenne. Achim, Aaachim! Jo, ess dat dann müjjelich? Dä hät mich jesinn un schmieß met beidse Häng, wat der Büggel herjitt! Esu ess hä, minge „wöste“ Achim! Danke! De Foßjruppe stolzeere en bungkte, wetzije Baselümcher aan mer vörbei. Do kütt minge jode Fründ, der Alt-Kölner Horst. Besser ess, ich laufe im tireck en der Ärm. Un wat soll ich üch sage, medden op der Neven-DuMont-Stroß krijjen ich ne Orde verpass. Ich klappere wie ne janze Schellebaum. E deck Bützje ess fällich. Eimol versöken ich et noch: Ilse, Iilse, Iiilse“ Do, et Ilse hät mich verhaftich jesinn, ess ävver op der verkehte Sick. Zo spät för zo werfe, ävver e Bützje vun fäns ess noch dren. Et Dreijesteen: Boor , Jungfrau, Prinz, de Rosa Funke un de Colombine – et Engk vum Rusemondachszoch ess do!

Hück, Fastelovends-Diensdaach, jonn ich et ehschte Mol mem Ihrefelder Zoch. Mich hann se op der Senatswage vun de „Domstädter“ enjelade. Die Lück am Stroßerand künne sich freue. Vun meer krijjen se hück dat, wat se welle, Kamelle un Strüüßjer satt!

Ich zorteere mi Worfmaterial hinger de Britz un en de Worfkässjer. Et süht janz öntlich us. Vun wäje kniestich! De Schukeladekatongs, Kamellebüggele un Strüüßjer stapele sich en klein Töön öm mich eröm. Et jeit loss! Öm de ehtschte Eck, noch zehn Meter, dann sin mer allt medden en däm Jewöhl! Vör minger Nas wäde klein Puute met Plastikbüggele un Plastikemmere huhjehalde! Nit bloß de Pänz schreie: „Strüüßjer! Kamelle!“ Nä, och die Jroße krijjen der Hals nit voll. (Hann ich jester och esu unmüjjelich erömjebrollt?) Do, he vörre, do kriss nix vun meer. Mer hann he op dem Wage nämlich keine “Willi”! Muss do deer ne andere Name enfalle loße. Joht ens all fott met de Höt un Pareplüs, met de Plastikbüggele un Emmere. Leev Herrjjöttche vun Biberach, ka’mer noch nit ens zehn Minutte stonn blieve, ohne unungerbroche werfe zo müsse? Wä soll dat dann all bezahle! Typisch, jetz rofen se natörlich tireck widder „Kniesköpp“! Jot, dat ich mer hück ming Lück ussöke kann, denne ich jet jevve, un wann ich einer nit sinn well, steit mer dat och zo. Un minge Name hann ich ehsch jehoot, wie mer jrad op den Venloer Stroß avjeboge sin. Tja, zo spät!

E Jläsje Kribbelwasser deit mer jetz jot... un do fällt et mer jlöndich heiß op: Ich benemme mich jenau esu wie jester die Lück em Rusemondachszoch. Et kloppe zwei Hätze en minger Bruss. Dat Rusemondachshätz steit unger met mer op der Stroß un jeert noh jedem Strüüßje un jeder Kamell. Met mingem Fastelovendsdienstachshätz föhlen ich mich bovven, huh op dem Wage, wie en Künnijin üvver e paar dausend Kamelle, e paar hundert Tafele Schukelad un Strüüßjer. Hück hann ich et Rejalt, kann verdeile wie un aan wä ich well, un wann ich ihrlich ben, jeneeßen ich dat Rofe un Winke. Ävver e bessje schrabbich sin die Minsche am Stroßerand jo doch!

Beim Wiggerrolle schüüß mer ne Jedanke durch dä möde Fastelovendskopp: Wie kummen ich dozo, unge die Lück schrabbich zo nenne? Wo ich doch selvs jenau weiß, wievill einem su e halvverdrüch Strüüßje beim Zoch bedück! Soll die ahl Raaf do unge doch dat Strüüßje un die Kamelle ensteche. Villeich dräump se dis Naach vun meer. Mer soll de Freud doch deile, alsu maat wigger – un Kölle Alaaf!

 
Zurück zur Übersicht

TOP MAGAZIN KÖLN – seit über 16 Jahren immer auch mit echt kölschen Texten

 

  Kölschtext  von Elfi Steickmann aus dem Buch

„Medden em Levve“

Erschienen im Greven-Verlag, jedoch nur noch im Direktvertrieb über die Autorin erhältlich

 

Elfi Steickmann, geboren 1947, schreibt seit vielen Jahren Texte in Kölner Mundart und tritt in Theatern, Komitees und immer wieder auch im WDR auf. Die Geschichte stammt aus ihrem Buch „Medden em Levve“ (2005).

Achtung:
neue Anschrift