Serie: „Echt kölsch“ – „Maibaumwaach“

April 2016 / Echt Kölsch
«

Serie: „Echt kölsch“ – „Maibaumwaach“

April 2016 / Echt Kölsch 

Von Dodo Hey aus dem Buch „Et hät noch immer jot jejange“, Bachem Verlag

 

Wie ich je jung Weech wor, dät ich ming Schullfründinne, die om Land wonne däte, grad öm der eeschte Mai ärg beneide. Wann die am 2. Mai en de Klass kome, woren die luuter am Strunze, wat mer inne för ne schöne Maibaum opgestallt hatt. En der Stadt kannt mer domols dä Bruch noch nit. Wie sollt dann och ene Fant ohne opzofalle om drette Stock en Birk am Finster fassbinge?

Zickdäm ich verhierodt ben, wonnen ich och om Dörp. Hee weed die aal Tradition ärg huhgehalde. Ävver e bessche hät se sich wall geändert. Fröher, su hatt mer mir verzallt, moot alles ganz höösch gemaht weede, domet de Hätzallerleevste die Üvverraschung och wirklich eets am Morge soch. Hügg geiht dat Spill met vill Spektakel vör sich un die Eldere vun däm Mädche müsse ne Kaste Bier springe looße.

Met Durchschlofe es do och för de Nohberschaff nix dren.

Mich hät dat nie esu gestürt. Em Gägendeil! Och hügg noch ligen ich en dä Naach em Bedd un ben gespannt am Luustere: „Wä weed morge wall ene Baum vörm Huus stonn han?“ Un morgens, am eeschte Mai, jöcken ich luuter nohm Maatplatz, för dä große Maibaum zo bewundere. Jet besonders Schönes es dat, ihrlich gesaht, gar nit: en lang Stang met ener Krun us Dannegröns un dodrop en Birk met bunte Bängele dran. Ävver op die Hüh kütt et aan. Je hühter desto stolzer sin de Lück em Dörp. Un die Pooschte vum Jungeselleverein setzen de ganze Naach un och am eetste Maidag un halde Waach. Us de Dörper drömeröm kummen dann de Fante aangeschrömp. Die versöke, de Waachmannschaff unger der Desch zo suffe, för dann dä Baum zo kläue. Eimol wör dat baal gelunge.

Mer han kei Mädche un esu däte mer dat Kreppche leider Goddes nie am eige Huus meterlevve. Nä, wat hätt ich mich gefreut! Ävver uns zwei Junge woren doför öm su mih op Jöck. Eimol hatten se e groß Problem. De Clique wor nit fröh genog op Zack gewäs, för sich ene Trecker met Aanhänger zo reserveere. Jetz stundten se met veer Bäum do. Wat maache? Uns Junge hatten en Idee. „Mer packen die op der Daachgepäckdräger!“ Zom Glöck woren et kein Kaventsmänner. Ävver för veer wor einfach kein Plaatz. Un jetz? Eine woodt om Garagedaach deponeet. Dann woodt ich en Beschlag genomme: „Mamm, wörs de su god un däts e Aug drop werfe, domet hä nit fottkütt? Mer kumme dä och baal holle.“ Uns Nohbermädche vun gägenüvver sollt och ene Baum krige, woodt gemunkelt. Dat Spill wollt ich doch meterlevve. Su wor an Schlofe dis Naach suwiesu nit su flöck zo denke. Un esu dät ich dä Fetze verspreche, god op dä Baum opzopasse.

Su gäge ein Uhr – ich wor ald e paar Mol erusgelaufe för zo loore, ov „unse“ Baum noch an singer Plaatz log – hoot mer vun fääns ald Musik. Dann kome se öm de Eck. „Wenn’s dir gut geht, keine Angst, das geht vorbei“, dröhnte et us de Boxe. De gesamte Nohberschaff wor waach. Ne Deeflader heeldt vörm Huus. E Monstrum vun enem Baum log drop. Met veer Mann wore se zo Gang, dä vum Wage zo hieve un hatten domet ärge Modeste. Genausu mem Opstelle. Noh zwei messlunge Versöke, brahten e paar Lück ehr Autos vörsichshalver en Secherheit. Dat Weech un sing Eldere looten däm Spill bang usem Finster vum eetste Stock zo. Dann hatten die Junge ne Enfall. Se bunge ne Streck öm dä Koloss. Einer sollt dann vun bovven dä Baum huhtrecke. Ävver wat mahten se? Se bungen dat Seil ungen am Stamm fass, su dat hä baal ne Koppstand maht.

Jetz dät sich der Vatter enmische, ih dat noch en Schiev ov söns jet kapodd ging. Un dann stundt dat Praachexemplar. E groß Hätz met Name woodt draangehange un noch flöck e Foto jemaht. Dann krähten se ehr Kess Beer un dä LKW satz sich en Bewägung. De Musik schäpperte: „Bye, bey, my love, maach et good, bes zom nächste Mol.“

„Nix, kei nächs Mol!“, meinte der Vatter, däm der Schweiß op der Steen stundt. Mer vertrok sich widder en de Hüüser. Zwei Uhr, jetz künnt mer lantsam en et Bedd gonn, daach ich. Uns Junge weede och jede Momang kumme un ehre Baum holle. Ich log kaum en der Kess, do hoot ich hingen em Gaade e Kloppe un Maache. „Wat es dat dann?“, stutzte ich un em Rüppche wor ich om Balkon. Do soch ich am Nevvehuus ne Maibaum stonn. Zick wann stellt mer ne Maibaum hingen en der Gaade? Dä soll doch jeder sinn künne. Do stemmp jet nit, ging et mer durch der Kopp.

Em Null-Komma-Nix wor ich en mingem Sportdress un av noh nevvenan! Wat ich mer ald gedaach hatt, „unse“ Baum wor fott. Bei de Nohbere, die och ene Fant un e Weech hatte, brannt noch Leech. Nohdäm ich zweimol geschellt hatt, woodt et düster em Huus. „No waad, nit met mir!“, saht ich stellches un schellten Alarm. Et doote noch jet, dann ging de Dür op un „ganz verschlofe“ stundt dä Filou vör mer. „Wie küss do an dä Baum do hinge?“, platzten ich erus. „Ich daach, dä hätt ene Fründ för ming Schwester gebraht un do han ich ehr dä opgestallt“, kom jet verläge sin Usred. „Dä hät ävver op unser Garage geläge. Dat es der Baum vun unse Junge. En fünf Minutte litt dä Baum widder do. Es dat klor?“ Ich wor jet en Rage, dann jede Momang kunnt uns Trüppche aankumme, för die Birk zo holle. Die brohte nit metzokrige, dat ich keine gode Maibaumwäächter wor. Am leevste wör ich drusse geblevve, bes die Saach en Oodenung wor. Ävver et wor jet fresch un ich wollt mer nit noch der Peps holle. Su vertrok ich mich widder en et Wärme. Et doote nit lang, do dät et schelle un dä Spetzbov dät stolz verkünde: „Alles Paletti, dä Baum litt widder op üürem Dach.“ Ne koote Bleck noh drusse – hä log wirklich op singer Plaatz.

Hungsmöd – mer hatte enzwesche ald drei Uhr – krabbelte ich widder in ming Fluhkess. Do ging de Dür. „Mamm, schlöfs de ald?“ – „Nä!“ – „Mer sin do, för dä Baum zo holle. Danke för et Oppasse!“ Ich wollt grad noch ens erunder, do woren se och ald widder fott. No jo, dann verzälle ich inne dat Kreppche evvens hügg Nommedag. „Hät jo noch ens alles god gegange“, griemelte ich mer eins un feel en ene deefe Schlof.

 
Zurück zur Übersicht

TOP MAGAZIN KÖLN – seit über 16 Jahren immer auch mit echt kölschen Texten

 

  Kölschtext  von Dodo Hey aus dem Buch

„Et hät noch immer god gegange“

(2008): E kölsch Leseboch – eine Sammlung zum Teil amüsanter, zum Teil besinnlicher Geschichten verschiedener Mundartautoren.

190 Seiten | J. P. Bachem Verlag | ISBN: 978-3-7616-2170-7

 

Achtung:
neue Anschrift