Echt Kölsch – die Serie im Top Magazin: Geschichten, Gedichte, Anekdoten op Kölsch. 

November 2017 / Echt Kölsch
«

Echt Kölsch – die Serie im Top Magazin: Geschichten, Gedichte, Anekdoten op Kölsch. 

November 2017 / Echt Kölsch 

»Der Opa Schulz wählt«

Echt Kölsch – die Serie im Top Magazin: Geschichten, Gedichte, Anekdoten op Kölsch. In dieser Ausgabe eine Geschichte aus dem Buch „Zwesche Himmel un Höll“ von Bernd Hambüchen (Bachem Verlag)

Dis Dag wore hee en Nordrhein-Wessfale Wahle aangesaht. De Demoskope – dat sin die Geheenakrobate, die ald vörher wesse, wo de Lück hingerher om Wahlzeddel ehr Krützche maache – hatte prophezeit, dat de Wahlbeteiligung su futzeklein wöödt wie lang nit mih. Wie dat evvens su passeet en turbulente Ömbrochzigge: Keiner kann et de Lück dann rääch maache. Se sin unzefridde un knatschig un looßen et an de Politiker us, die op eimol alles schold sin. Sugar wann et rähnt oder de Nöll läuf. Un Nöttelefönes un Quiselsmatant gläuve, inne en Nas drihe zu künne, un gonn nit wähle. Noh däm Sproch: „Maht ehr dat, wat mer nit pass, mäht mir Wähle keine Spass. Dä, jetz hat ehr et!“ Se welle nix mih met der Politik ze dun han. Su eifach es dat för intellektuelle Dönnbreddbohrer. Jedem, dä kei Strüh em Heenskaste hät, es natörlich klor, dat pikeete Levverwoosch ze spille noch nie en Kaar us dem Dress getrocke hät. Dat hatt och dä Schulzes Henn geschnallt. Wä dat es? Dat es der Sonn vum Opa Schulz, vun Berof Lehrer. Dat merk mer im luuter och aan, ovschüns hä ald lang pensioneet es. Hä es ärg ätepetät, penibel un pingelig un hät villleich doröm kei Frau gefunge, die singe Aanspröch genöge kunnt. Met singem Vatter huus hä ald zick Johr un Dag zosamme en der kölsche Provinz, dat heiß, op der Schäl Sick en Dellbröck, ganz noh bei de Bergische Boore. Wann ich üch no sage, dat der Henn sibbeunsechzig es, ka’mer dat Alder vum aale Schulz beinoh errode. Hä dräht zor Zigg en Schnapszahl om Puckel met sich eröm. Nüngunnünzig Johr es hä vör kootem woode. Met singe Knoche kanns do de Äppel vun de Bäum kägele, su dadderig daggelt hä eröm. Un vör e paar Johr es hä – wie mer su schön säht, ovschüns et einer bedröv – vun der Läuv en der Keller gefalle, wobei im e paar Tasse em Schaaf kapodd gegange sin. Nor noch eine Wunsch driev in aan: Hä well singe hundertste Gebootsdag fiere. Woröm? Weil dä Oberbürgermeister im dann gratuleere kütt. Vun däm häld hä nämlich vill. Dä hät in ens anno Pief gegröß. Lang vör däm Wahlsonndag hät dä Henn singe Vatter bekneet, sing Stemm schrefflich avzegevve, un im en Woch lang de Wahlmetdeilung höösch op der Fröhstöcksdesch nevve de Kaffeetass gelaht. Ävver dä Aal wollt partout nit. Nit dat dat ene politische Grund gehatt hätt. Dat nit. Ävver im wor met der Zigg der Durchbleck avhande gekumme. De politische Färvelihr met Schwatz, Rud, Gääl un Grön ging ald lang üvver singe Horizont un im och an der Fott vorbei.

Wie dä Wahlsonndag kütt, mäht dä Henn ne neue Aanlauf. Wann dä Vatter met im nohm Wahllokal köm, dät hä im e groß Kölsch en singer Lieblingsweetschaff spendeere, villleich och zwei. Dä Aal es ene Augebleck unschlössig. Dann säht hä – ganz en de Knolle schingk hä noch nit zo sin –, se hätte jo noch Kölsch em Kaste em Keller. För ein Kölsch bröht hä nit en de Weetschaff zo gonn. Su bliev däm Henn om Wahlsonndag nix anderes üvverig, wie allein en et Wahllokal ze dötze. Ävver die Wahlstemm vun singem Vatter lööt im kei Rau. Su frög hä de Wahlhelfer ganz nevvebei, wie mer am Wahlsonndag söns noch wähle künnt. Singe Vatter wör ganz jih malad woode, lög en der Lappekess un künnt de Wahlurn nit met singer Stemm beglöcke. Die üvverläge erop un erav un schöddele schleeßlich met bedrövtem Geseech der Kopp. Dä Henn es beinoh ald widder durch de Pooz, do fällt einem vun dä Kääls en, hä künnt jo ens Kontak mem Wahlamp vun Kölle opnemme. Do dät hügg der Stadtdirektor selver et Zälle beaufsichtige. Wann nit dä, wä wöss dann ene Drih. Dat Amp lög ävver am andere Engk vun der Stadt en Chorweiler. Ov hä nit de Rofnummer han wollt, för sich eesch ens schlau zu maache. Nä, well dä Henn nit. Ne tirekte Kontak en su ner delikate Saach es et bess, denk hä, un mäht sich stantepe met singem Jöckemobil op der Wäg. Ovschüns op de Stroße nit vill loss es, vergeiht doch baal en Dreiveedelstund, bes hä dä Wahlschobbe gefunge hät. Der Stadtdirektor es nit ze sinn. Ävver hä hät och su Erfolg. Ne Wahlexperte verklatüstert im, dat de Stemm vum Opa nit verlore wör. Wann dä Henn dä Wahlsching un en Vollmaach vun däm aale Häär beibränge dät, dät hä im der Wahlzeddel ushändige, op däm dä Opa sing Krützche maache künnt. Aldewiel sich dä Henn höflich bedank, denk hä stell bei sich: „Wat för ne verd …! Dodran hätt ich och selver denke künne“. Met enem Kühm prakeseet hä wigger: „Un dä wigge Wäg! Woröm han se eintlich dä Wahlschobbe en Chorweiler opgemaht? Ävver et es, wie et es. Ophüre kütt för mich nit en Frog. Wat ich aanfange, bräng ich och an et Engk. Wat deit mer nit all, för de Wahlbeteiligung aanzehevve!“

Dä Wäg noh Dellbröck zöröck schaff hä en ner halve Stund. Wie hä zo Hus aankütt, setz der Opa vör der Äugelskess. Op sing Frog, wo hä su lang gewäs wör – dat es singe stereotype Satz, egal, wie lang einer fott wor –, gitt dä Henn kein Antwood. Hä es ald met dem Wahlsching durch de Dür, do fällt im en, dat noch die Vollmaach vun singem Erzeuger fählt. Wie es däm nor beizebränge, dat hä ne Wahlgang för in vörgesinn hät?. Wo dä sich doch bes zoletz met Häng un Föß dogäge gestemmp hät. Hä simeleet un prakeseeet. Op eimol fällt im en, wie dat gonn künnt. „Papp“, hivv hä aan, „do frögs, wo ich wor? Ich wor wähle. Do gläuvs nit, wä ich getroffe han.“ – Kein Antwood. Der Papp es met singe Gedanke widder em Nirwana op Reis. – „Wells do nit wesse, wä ich getroffe han?“ – Dä aale Mann luurt wigger en dä Flimmerkaste, ohne singe Filius zo beaachte. – „Hür doch ens! Der Oberbürgermeister hät met mer gekallt. En lang Zigg un esu fründlich.“ – Kein Reaktion. – Hä röf im tirek en et Uhr: „Der Oberbürgermeister, versteihs do, der Oberbürgermeister!“ – Der Opa Schulz horch op un rappelt sich en singem Sessel huh. „Der Oberbürgermeister? Wirklich? Sag, wat hät dä dann gesaht?“ – „Hä hät mich noh dir gefrog. Wie et der geiht un esu … Ich soll dich hätzlich vun im größe.“ – „Un wigger nix?“ – „Doch! Hä bruch dich, hät hä gesaht.“ – „Wirklich? Dat freut mich ävver. Wat kann ich dann för in dun?“ – „Hä hät gesaht, hä bruch ding Stemm hügg bei de Wahle“ – Wirklich? Nä su jet! Ming Stemm bruch hä? Wat för en Ihr! Do kann ich nit ‚Nä‘ sage. Wat muss ich dann dun, för im ming Stemm zu brenge? No sag et ald!“ Dä Henn verposementeet im die Saach, un ungedoldig setz dä aale Kääl sing Ungerschreff – waggelig, ävver klor – unger die Vollmaach. Domet mäht sich singe Sonn widder op dä Wäg vun der Schäl Sick noh Chorweiler. Ungerwägs fällt im heiß op de Siel, dat hä die Tour noch ens maache muss. Nämlich wann singe Vatter dat Krützche om Stemmzeddel gemaht hät.

Dreimol dä Päädswäg hin un zoröck! För ein Stemm! Ävver wat deit mer nit all, öm de Wahlbeteiligung huh ze schruuve un de Demokratie ze rette. Alles flupp och. Wie hä zom drette Mol en Chorweiler – dismol met däm usgefüllte Stemmzeddel vum Opa – enläuf un sing Kaar vör däm Wahlschobbe park, kann hä singe Vörwetz nit mih zügele. De ganze Fahrt üvver hät in ald de Neugier geplog. Wat hät dä Vatter gewählt? Es met däm Stemmzeddel alles en Odenung? Hät sich sing Möh gelohnt? Ovschüns im e schlääch Gewesse ze schaffe mäht – vun wäge geheime Wahle un esu – maht hä höösch dä Breffömschlag op. Un wat süht hä? Singe Erzeuger hät akkurat ne zosätzliche Kreis gemolt, sauber e Krütz dren gesatz un donevve dä Name vum Oberbürgermeister geschrevve. Eesch es hä su perplex, dat im de Luff för zo Odeme fählt. Dä ganze Opwand för nix un widder nix. Doch ih dat Ärger sich en singer Siel breid maht, fällt im op, wie jeckig die ganze Saach es. Un hä laach, dat im de Trone de Backe erav laufe. Die Lück, die am Wage vorbeischröme, luure komisch un denke, hä hätt en Eck av. Ävver dat es im dismol ganz egal.

 

 
Zurück zur Übersicht

 

Bernd Hambüchen, 1940 bei Köln geboren, wuchs im Bergischen Land auf. Nach dem Studium der antiken Sprachen, Geschichte, Philosophie, Theater- und Sozialwissenschaften war er Gymnasiallehrer und Lehrbeauftragter an der Universität und Fachhochschule Köln. Seit 2005 befindet er sich im Ruhestand und widmet sich dem Schreiben von Kurzgeschichten und Gedichten in Hochdeutsch und kölscher Mundart.

 

Achtung:
neue Anschrift