Wie de Hellije Drei Künninge noh Kölle kome

Dezember 2016 / Echt Kölsch
«

Wie de Hellije Drei Künninge noh Kölle kome

Dezember 2016 / Echt Kölsch 

De ahl Frau Runge hatt ehr Enkelche do. Et Anja wor för si Levve jän bei der Oma, weil die immer su schön verzälle kunnt. Et leevs hoot et Anja die Verzällcher vun fröher. Hück hatt et allerdings jet anders om Hätze. „Oma, do weiß doch su vill ze verzälle. Weiß de dann och, wie de Hellije Drei Künninge noh Kölle jekumme sin? Dat ha’mer nämlich en der Schull jeleh’t.“ Die Runges nohm dat Klein en de Ärme un dröckten et janz fass aan sich. „Secher weiß ich dat, mi Buselche. Jede Kölsche weiß dat!“ „Jo? Dann verzäll ens. Dann well ich ens sin, ov do och verhaftich alles weiß!“ Un de Oma fing aan ze verzälle: „Mer schreff et Johr 1164. En Kölle hatt der Rainald von Dassel als Ääzbischoff et Rejalt. Met singem Amp hatt’e et ävver nit esu. Hä dät leever delejeere. Hä hatt vill mih aan de Jäng met singem Job als Kanzler vum Kaiser Friedrich Barbarossa un jingk och leever met däm op Reis, för Kreech ze föhre. Eines Dachs hatten se de Stadt Mailand belagert. Der Barbarossa woll der Bürjermeister gefange nemme un de Stadtbrüjer ushungere. Wie die Minsche nit mih Pol halde kunnte wor de Äbtisstin vum Kluster su ärch en de Bräng, dat se bei der Rainald kom un saat, dat hä der jrößte Schatz hann künnt, dä se hädden: De Knoche vun de Hellije Drei Künninge en ener unschingbare Kess. Doför mööt hä der Kaiser dozo bränge, winnichstens de Fraue us der Stadt eruszeloße. Se däten och bloß esu vill metnemme, wie se selvs drage künnte. Der Rainald, dat jeräuchte Pööschje, versproch no dem Kaiser, dat die Stadt am nöhksten Daach enjenomme wäde künnt, un dat hä doför der janze Besetz, all dat Jold un Jeschmeide kräch, wat et en der Stadt jov, wann hä de Frauklück erusleet, bloß met däm bepack, wat se püngele künnte. Hä selvs, der Rainald von Dassel, wöll bloß die unschingbare Kess hann, die em Jlocketurm vun der Kirch San Giorgio al Palazzo stündt. Op dä Handel leet der Kaiser sich en un versproch, et su ze maache. Im jing et jo zo allerehsch öm der Bürjermeister. Der Barbarossa leet de Pooze opmache un erus kome sämplije Fraulück. All hatten se dat jepack, wat inne am leevste wor. Zoletz kom de Äbtisstin! Sei drohch om Rögge ehre Broder, un dä wor der Bürjermeister! Wie der Barbarossa dat sohch un metkräch, dat singe Kanzler sich bovvendren och noch de Hellije Drei Künninge an Land jetrocken hatt, hädden hä sich vör luuter Wot bal en de Fott jebesse. Äver versproche wor versproche!

»Wie der Barbarossa dat sohch, hädden hä sich vör luuter Wot bal en de Fott ebesse.«

För die Knoche secher noh Kölle ze krijje, vör de Spetzbove un Hanake kunnt mer sich nit jenohch en Aach nemme, hät der Rainald sich en Less usjedaach. Hä dät dat Jeröch usstreue loße, dat en der Kess Zaldate löhche, die aan ener huh aanstechende Krankheit jestorve wöre, un hä hät x-mol singen Heimwääch verändert. Su kom et, dat’e met singer Kreechsbeut schleeßlich em Juli 1164 en enem Triumpzoch durch et Dreikünningepöözje en Kölle entrecke kunnt. Un do hät der Ääzbichoff Rainald von Dassel der Jrundstein för der Tourismus en Kölle met jelaat. „Wiesu dat dann?“ woll et Anja janz erstaunt wesse. „Weil no Piljer kome, Piljer üvver Piljer, för die Künninge aanzebedde“, verklörten im de Oma. Et komen esu vill, dat der Karolingische Dom, dä immerhin och bal 100 Meter lang wor, vill ze klein woodt. En halv Johrhundert späder hann se dann dä Drei Hellije zo Ihr vun dem Lothringische Joldschmidd Nikolaus von Verdun dä Schrein us Jold un Edelstein baue loße, dä hück noch em Dom steit. Un no kome noch mih Piljer. Jetz wor der ahle Dom nit mih bloß ze klein, nä, jetz wor’e och ze schäbbich för dat Prunkstöck. Deswäje hann se sich entschlosse, ne neue Dom ze baue, su praachvoll un esu jroß, wie noch nie ei Minsch eine jesinn hatt, met zwei Türm, die bes en der Himmel eren recke däte un alles en allem üvver zehndausend Türm un Türmcher, wa’mer bloß die rechent, die hüher sin wie ne halve Meter. Ävver do wor der Rainald von Dassel allt lang dut. „Boh“, saat et Anja und schmeechte sich aan sing Oma, „do weiß jo mih wie minge Lehrer.“ Jetz maat et lus Äujelcher. „Ävver alles weiß de doch nit! Verbreef ess nämlich bloß, dat op der Kess us Mailand jet vun drei Magier, alsu Weise, stundt. Ov dat ävver jenau die wore, die aan der Kripp jebäät hann, weiß keiner. Dat jenau drei aan der Krepp jestande hann nimmp mer och bloß wäjen der drei Jeschenke Weihrauch, Myrrhe und Jold aan. Et steit och vun zwei bis vier un sujar vun zwölf jeschrevve.

»Et woren alsu weder drei, noch Hellije noch Künninge.«

Künninge woren et üvrijens kein un offiziell hellich jesproche woodten se och nie. Et woren alsu weder drei, noch Hellije noch Künninge un en dem Dreikünningenschrein em Kölner Dom lijjen se och nit. De Wessenschaffler hann nämlich eruskräje, dat do de Üvverreste vun enem zehn- bes zwölfjöhrije Jung, nem knapp dressich- un enem unjefähr fuffzichjöhrije Mann dren lijje. Sujar der fröhere Domprobs Henrichs hät jesaat, dat et im ejal wör, ov die Reliquie ech wöre odder nit. Wichtich wör doch bloß, dat de Minsche domols dovun üvverzeuch wore, dat se de Hellije Drei Künninge noh Kölle jehollt hann!“ „Mein Jott, Kind, do määs mich bang“ jriemelten die ahl Runges no. Natörlich dät se im nit verrode, dat se dat och jehoot hatt. Se trok et widder aan sich. Jetz nohm se et nit bloß in de Ärm, nä, och op et Ärmche: „Wann do wigger su jot en der Schull oppass, dann bes de bal schlauer wie ich. Nit dat do eines Dachs noch selvs ene Weise wees!“

„,Bei uns em Veedel’ hann ich dat Boch jedäuf, weil all die Verzällcher, die ehr he lese künnt, en unsem Veedel, nem typisch kölsche Veedel spille. Se beschrieven der Alldaach bei all unse Nohbere. Die ein odder andere Stroß kennt mer villeich, ävver janz secher kennt mer die Lück us dem Veedel odder zemindes su en Lück! Se wonnen en bal jedem kölsche Veedel.“ Marita Dohmen

Bei uns em Veedel | 128 Seiten | Hardcover |Regionalia Verlag | ISBN 978-3-95540-240-2

 
Zurück zur Übersicht

Marita Dohmen, geboren 1941 in Köln- Lindenthal, ist verheiratet und Mutter von zwei Töchtern. Ob früher als Lehrerin oder heute als Seminarleiterin an der Akademie för uns kölsche Sproch, ob als Mitarbeiterin im „Mittwochskreis“, dem Arbeitskreis Kölner Mundartautoren im Heimatverein Alt-Köln, und auch seit 1999 als Kolumnistin der Kölnischen Rundschau: Liebe- und humorvoll bringt sie uns Denkweisen und Sprache näher.