Serie: „Echt kölsch“ – „Immer ess jet“

Juli 2016 / Echt Kölsch
«

Serie: „Echt kölsch“ – „Immer ess jet“

Juli 2016 / Echt Kölsch 

Et Leni, knapp vör der Rent, hatt koot hingerenein sing Eldere bejrave müsse. Allebeids woren se alt un maläzich jewäse, un op eimol jingk et janz flöck der Birch erav. Nohdäm et Leni, de einzije Doochter, der Nohlass jerejelt un de Wonnung opjelüs hatt, blevv noch en öntlije Stang Nüsele üvverich, womet it ihrlich nit jerechent hatt. Natörlich hatt im bei der janze Akzijun rund öm sing Eldere singe Mann, der Mattes, immer su vill hä kunnt, jeholfe, un no woodt jemeinsam üvverlaht, wat mer met däm unverhoffte Jeldsäje maache sollt. Op de Bank aanläje, doför woren se nit, et jov doch kaum Zinse. Ne Ömbau em Reihehüüsje wor nit jeplant, ävver en neu Köch, die hatt et Leni sich allt lang jewünsch. Die ahl Köch, bal „antik“, met dä fiese ohße blotfärve Kachele aan de Wäng un däm kackbrunge Linolijumboddem künnt jot e neu Jeseech verdrage.

Et woodt nit mih lang üvverlaht un die neu Köch, jetz brohten se nit op e paar Euros ze loore, en Aanjreff jenomme. Noh langem Ussöke un Köchebesichtijunge bal em janze Erzbistum, hatten se dat jefunge, wat dem Leni singe Draum wor, en janz modäne helle Lackköch met vill Stohl, dobei der Ovve, de Spölmaschin, de Mikrowell, der Backovve met Jrill, der enjebaute Kaffeautomat, Leech bes en jede Eck, dat all om neuste technische Stand. Mer broht quasi nor der Ovve aanzehoste, de Spölmaschin aanzespreche, der Mikrowell jet vörzesinge, dann jingk alles wie vun Jeisterhand allein aan. Su en Köch wör sujar ne Jewenn för e janz fing Nobelrestorang, en där künnt mer de Nuvelle Cuisine koche un jeneeße. Dat mer su jet Edles nit vör ohßeblotfärve Kachele un op kackbrunge Linolijum stelle kunnt, versteit sich vun selvs, alsu moot nit nor die ahl Köch erus, nä, och de Kachele moote vun de Wäng un dä widderlije Boddem fott. Donoh kom dann ehsch der Flieseläjer met dä neu usjesookte Plaate för Wäng un Boddem aan de Reih. För däm janze Dreck us de Föß ze jonn, woren et Leni un der Mattes för die Zick, su unjefähr sechs Woche wore för alles enjeplant, en en klein Feriewonnung de Eck eröm met de nüdichste Saache jetrocke.

»Ich frogen mich, wat määt dat Leni eijentlich met su ner doll Köch?«

Dat sich die janze Akzijun öm zwei Woche verzöjere dät, domet hatten se bal jerechent, doch irjendwann heeß et: morje kütt die neu Köch! Jo, un dann kom se och. Zwei Däch woodt die vun Faachlück opjestallt, aanjeschlosse, aanjedübbelt. Et jov kaum jet zo bemängele. He un do woodt noch jet nohjebessert, un dann kunnten et Leni un der Mattes widder noh Huus trecke un de Köch enrüme. E bessje steril, jet jewöhnungsbedörftich, sohch die neu Köch met däm blänkije Edelstohl us, su e janz klei bessje noh Spidol, janz ungem em Keller ... do, wo mer labendich freiwillich nit herrjeit. För der neue Ovve met Induktzijunsplaate broht mer jetz noch neu Pött un Panne. Dat Dolle aan der Köch wor, dat, wa‘mer sich janz noh vör en Schrankdöör ov e Schoss stellen dät, dat nor durch der Körperkuntak vun selvs opjingk. Och dat Vörrotsschaaf. Doll! Nor, do wor, wie allt fröher, nix dren!

Nit dat ehr denkt, ich wör fies, dat ben ich nit, ävver ich frogen , wat määt dat Leni eijentlich met su ner doll Köch? Ich kenne die zwei allt üvver zwanzich Johr un weiß, dat et Leni janz streng vejetarisch lääv, sich mem Koche mih wie ärch zoröckhält un domet nix, nä üvverhaup nix am Hot hät. Ehr kennt dat doch, Vejetarier kaufen de Woosch nit beim Metzjer, nä, em Jemöslade. Mer kann dat och su sinn: Vejetarier esse mingem Esse et Esse fott. Der Mattes määt dat Kningslevve met däm janze Jrönzüch, weil hä nit jeden Daach Ärjer hann well, met deckem Hals met. Ävver wann et im ze bungk weed, wann et Leni widder ens röf, Schatz, kumm aan der Desch, et Esse verwelk söns, un weil hä Schless op e Stöck Fleisch hät, wat et Leni im dann met nem medizinisch fundeete Vördrach usredde well, hängk och allt ens der Huussäje scheif, un dann häut hä sich e öntlich Steak en de Pann, määt sich e paar Botterramme met deck Fleischwoosch drop un iss sich endlich widder ens satt.

Vör kootem hann ich jehoot, dat et Leni jetz nor noch vejan iss un koch. Jetz darf der Mattes sich jo noch nit ens mih „tierisch“ opräje. Der ärme Kääl, secher stellt dä sich av un aan vör dat leddije Vörrotsschaaf, dräump vun der ahl Köch, däm ahle Ovve un fängk et Kriesche aan. Do woren wennichstens noch e paar Fettflecke drop, un wann hä de Nas aan de Avzochshaub jehalden hät, lohch mänchmol noch der Jeroch vun singem letzte Steak en der Luff. Et ess keine Truus för der Mattes, dat mer als Vejetarier ov Vejaner jesünder stirv. Ovschuns ich jläuve, selvs Vejetarier bießen nit jän ze fröh en et Jras!

»Schatz, kumm aan der Desch, et Esse verwelk söns ...«

 
Zurück zur Übersicht

TOP MAGAZIN KÖLN – seit über 16 Jahren immer auch mit echt kölschen Texten

 

  Kölschtext  

„Immer ess jet“ ist Elfi Steickmanns achtes Buch und das erste, das im Marzellen Verlag erscheint. Es reiht sich mit kuriosen, komischen und ur-kölschen Texten perfekt in das Repertoire der Autorin ein. Ihre Geschichten und Gedichte „medden us dem Levve“ sind mal zum Schmunzeln,  al zum Grübeln und dabei stets lesenswert.

160 Seiten | Marzellen Verlag | ISBN 978-3-937795-37-9

 

Elfi Steickmann, geboren 1947, schreibt seit vielen Jahren Texte in Kölner Mundart und tritt in Theatern, Komitees und immer wieder auch im WDR auf. Das Gedicht stammt aus ihrem Buch „Kopp huh, Kölle!“ (2005), erschienen im Greven-Verlag Köln – ebenso wie „Op Kölsch durch et Johr“ (2006), „Alaaf, Kölle! (2008) und „E Büttche Bunt“ (2011).