Serie: „Echt kölsch“ – „Wandere määt su vill Freud“

Juli 2016 / Echt Kölsch
«

Serie: „Echt kölsch“ – „Wandere määt su vill Freud“

Juli 2016 / Echt Kölsch 

Vorveröffentlichung aus dem im September erscheinenden Buch „Immer ess jet“ von Elfi Steickmann

Ess sich dann de Famillich immer noch nit einich, weil jeder singe persönlije Mostert dozo jitt, weed allt nor die Planung för ne erholsame Orlaub zom Eierdanz. Dä eine mööch Sonn, der andre Wasser un Strand, der nöhkste öm Joddes Welle nit ze vill Sonn, leever vill Schatte, zentrale Laach vum Hotel, e Veer-Stäne-Huus mööt et suwiesu sin, met jodem Esse, ärch kinderfründlich, ävver nit ze laut. E Jeschenk vum leeven Jott, wa‘mer dat dann all verhaftich fingk un de Famillich zefridde ess. Wie wor dat fröher bei uns Derheim? Mer hatte ne Fünf-Persone-Huushalt. Dat wor der Papp, de Mamm, ming Schwester, minge Jroßvatter un ich. Un et wor en de jroße Ferie jar nit müjjelich, met alle fünf ze verreise. 

 

Ehschtens hatte mer nit dat nüdije Jeld un dann moot der Jroßvatter versorch wäde. Hä hatt en singem janze Levve noch nie Ferie jemaat un wor nit ze bewäje, en singem huhe Alder – hä wor Engks aachzich – dat ens ze versöhke. Ävver weil der Papp der Haupverdeener vun der Famillich wor, wor de Mamm der Meinung, winnichstens hä mööt e paar Woche us dem ahle Trott erus un dröm fohr der Papp immer drei Woche en et Oberberjische noh Drabenderhöh. Dat de Mamm ne jroße Huushalt föhren dät met allem Dröm un Draan un selvs noch nie och nor eine Daach Ferie jemaat hatt, dovun sproch keiner. Minge Papp wor ne Wandervurrel. Wo ander Minsche Föß hatte, hatt hä Wanderstivvele. Hä broht vill fresche Luff, vill Jröns för ze talpe un jot Esse. Un dat jov et all em Berjische, dozo noch för winnich Nüsele.
Meer Pänz, alsu ming Schwester un ich, mer woodten em Wääßel  metjenomme. Ihrlich, vill leever wöre mer Derheim bei der Mamm un dem Jroßvatter jeblevve, denn noh drei Woche Wanderlevve mem Papp, hatte mer Plattföß, Blose aan de Fäschte un och et kleinste Fitzje Freud verlore, en de resslije Ferie nor e paar Schrett ze vill ze maache. Ävver der Papp jläuvten, uns en riesije Freud met dä drei Woche „Superferie“ ze maache.
Die Avfaht wor allt e Malörche. All dat, wat ich metnemme wollt, woodt widder usjepack un nor vernünftije Saache dorfte met en der Koffer. Schleppe moot ich dä suwiesu allein. Ävver die Wanderschohn, die widderlije, decke, hässlije Knäbbele, die dät der Papp nie verjesse.
Vum Düxer Bahnhoff fohr domols ne Bus en ca. zwei Stund noh Drabenderhöh. Hück fleje mer en e paar Stündcher en der Süde odder op ne ander Kontinent, jot opjehovve en nem Luxusflejer, ävver dat ess nix jäjen uns Busfaht. Der Papp wor ne Pünklichkeitsfanatiker. Hä moot zo jedem Termin off zo jeder Stroßebahn mindestens en halve Stund fröher aan Oot un Stell sin, ehsch dann wor hä zefridde. Alsu stundte mer uns am Düxer Busbahnhoff de Bein en der Buch.
Der Bus kom pünklich, die Koffere woodte verstaut, d. h. en Jepäcknetze odder unger de Bein, un wann jar nix mih jingk, om Schuuß, natörlich op mingem. Bei uns jingk et nie anders. Weil minge Papp nit jot eng setze kunnt – besser nit woll – aanjewinkelte Bein wöre schlääch för singe Kreislauf, wor die Plaatzwahl nit eifach. Wie ne Jeier dät hä sich op die hingere Setzbank stöze un do die Plaatz en der Medde beläje.
He kunnt hä wunderbar sing Ärm un Bein usstrecke. Ich soß en ner Eck met dem schwere Koffer om Schuuß. Ming Ärm- un Beinfreiheit dät kein Sau interesseere. Janz unjefährlich wor ävver die Meddelplaatz vum Papp met  chosslinie bes op der Schuuß vum Busfahrer nit.
Ävver wä daach aan en Vollbemsung? Keiner! Die Faht jingk loss un die Setz ohne Fedderung maaten die Toor zo ner hubbelije Magen- un Darmstreck. Unungerbroche moot einer us dem Bus en et Jröne för ze pinkele.
Mer woren su unjefähr en jode Stund ungerwächs, et jingk jet avschüssich der Hang erav, do moot der Fahrer jih bremse. Minge Papp wor jrad en Zeidung am lese un hatt die Zituatijun nit su rääch em Bleck. Dat Avbremse maat us im e Jeschoss, hä dät us singem Sitz huhfleje un schoss, de Zeidung noch immer vörm Jeseech, noh vürre. Koot vör der Windschutzschiev kom hä verschreck zom Stonn.
Dä Daach fingk ihrlich allt jot aan. Üvvrijens, die ander Däch och. Morjens 6.00 Ohr fröhliches Wecken. Vörm Fröhstöck wor et em Bösch besonders jesund un noh’m wäsche met ieskahl Wasser, Wärm- wasser jov et suwiesu nit om Zemmer, jingk unse Fröhmarsch met nem löstije Leedche op de Leppe loss. Drei Stund woren ne Klacks, op jede Fall för der Papp, un et jov ungerwächs, ußer sing widderlije, zesammejepaaschte Salmijakpastillcher, nix ze esse un nix ze drinke.
Nommedachs dann noch ens drei Stündcher wandere un ich feel ovends hungksmöd en de  Fluhkess.
Je mih Däch vun dä drei Woche verjingke, je unlöstijer woodte ming Wanderleeder, un ich kunnt die Salmijakpastillcher nit mih sinn.
Naaks dräumten ich, endlich ens widder em eije Bett ze schlofe, av un aan mich och ens wärm bade ze künne un dat ich üvver ming wunde Plattföß selver bestemme künnt.
Der Papp hatt sich prächtich erhollt, hä hatt jenohch Luff un Nator jetank un freuten sich op sing Arbeit. Un ich, ich freuten mich op de Summerferie em nöhkste Johr, dann dorf ich bei der Mamm un beim Jroßvatter Derheim blieve, dann wor ming Schwester met dem Wanderlevve, Plattföß un Blose draan.

 
Zurück zur Übersicht

TOP MAGAZIN KÖLN – seit über 16 Jahren immer auch mit echt kölschen Texten

 

  Kölschtext  

Vorveröffentlichung aus dem im September erscheinenden Buch „Immer ess jet“ von Elfi Steickmann mit kuriosen, komischen und urkölschen Texten. Darin beweist die Mundart-Autorin erneut ihre feine Beobachtungsgabe, die in allem Ernsten das Heitere und in allem Heiteren das Ernste entdeckt, ihr ausgeprägtes Sprachgefühl und ihr großes erzählerisches Talent. 
Ca. 176 Seiten | Marzellen Verlag | ISBN 978-3-937795-37-9

 

Elfi Steickmann, geboren 1947, schreibt seit vielen Jahren Texte in Kölner Mundart und tritt in Theatern, Komitees und immer wieder auch im WDR auf. Das Gedicht stammt aus ihrem Buch „Kopp huh, Kölle!“ (2005), erschienen im Greven-Verlag Köln – ebenso wie „Op Kölsch durch et Johr“ (2006), „Alaaf, Kölle! (2008) und „E Büttche Bunt“ (2011).